المقزدر

كونا غاضاحكين ومقلقلين على أبونوفل شباط.. فاش مشا لميريكان وحضر مؤتمر ترامب.. كلشي ضحك وشبع ضحك.. وكلشي اعتبر شباط كيما قال بنكيران غاهبيل وحمق.. حتى دارت الايام وصدق دابا شباط هو زعيم الديبلوماسيين بالمغرب في خارجيتها اتجاه أمريكا ترامب.. بغات الدولة ولا كرهات.. لأنه تحمل شخصيا مصاريف الحمارة والطيارة ومشا يعاون ترامب.. وهي الخطوة لي حتى شي نزق وعايق فالدولة مافكر فيها..

ايوا شتي.. ومن الهبل ما نفع.. شباط بعد اعلان ترامب فائزا برئاسيات أمريكا.. طلع والله أعلم أكثر واحد فرحان بهذا الفووز فالمغرب.. وهو نيت لي عارف علاش خصو يفرح.. واخا 34مليون كاعيا لحقاش ترامب ربح.. وماعارفينش علاش محاملينش ترامب يربح.. ربما لحقاش شي محللين سياسيين معوقين قالو ليهوم باللي ترامب خطر على لقرعة دميريكان وخطر على الصحراء المغربية..! يا سبحان الله فحال زعما ميريكان لفيرما ديال باين ترامب يدير فيها لي بغا.. وتا نوضو تشللوا..

شباط أول حاجة دارها ملي فاق هذا الصبح.. اتصلو بيه شي صحفيين.. وهو يبدا يزغرت.. وفرح بترامب وشكرو.. وساط حتى فبنكيران وطاسيلت حكومة وحزب بنكيران.. وهذا شيء طبيعي السيد سخن بفووز ترامب.. ودابا كونو على يقين باللي يقدر يشرط على  بنكيران باش يتحالف معاه يعطيه وزارة الخارجية.. اييه مالكوم جاتكوم غريبة.. اللي طلب رئاسة البرلمان ما يطلبش الخارجية.. وزيدون فهذا البلاد المسؤولية مكاتخادش بالكفاءة.. كاتخاد بصنطيحة.. وشوية دجبهة.. وكيما كان لحال شباط تجي معاه ديبلوماسي.. وواخا ماقاريش نديرو معاه بوريطة وبوعيدة يعاونوه.. راه مسكين تمحن باش مشا ساند ترامب.. ويالاه نيت فخمس سنين جايا يجمع فلوس طيارة لي خسرها..!