ها عار ربي آش هذا الشوهة اللي مابغيتيوش تهنيوانا منها.. هدشي غاوصاكوم الملك.. حلفيتو غا تكملو كعياتكم.. بغينالكوم لي مايتبغا..

ولكن بيناتنا.. مزيانا نيت فيكوم.. داك نهار بنكيران فضح أخنوش على شروطو لدخول الحكومة.. واللي كانت فالأساس على ماقالو خوت بنكيران إلغاء دعم الطبقات الفقيرة (اصلا الشعب كولو فقير).. وهو الموضوع لي حاول يبان فين بنكيران حنين على المسكين.. وشيطن فيه أخنوش اللي حس بالشمتة.. ودابا راه حالفها فبنكيران حتى يردليه الصرف.

واليوم خرج بوحناك دلشگر قالك بنكيران هو لي قالو ماتخرجش اش دار بيناتنا فالاجتماع دالمشاورات.. وحگا اجي نقولوليهوم.. المجالس أمانات.. ليتفاجأ ببنكيران من بعد تايقول بلي حزب الوردة ماحددش موقفو من دخول الحكومة.. ولشگر عاد حس بالقالب ملي شاف بنكيران كايستغل عدم إطلاع الإعلام على فحوى المشاورات.. باش يبان مسكين ومحگور.. باغي يخدم لبلاد والحلفاء مكبرين كرشهوم.. وحتى لشگر دابا راه حالفها فبنكيران على هذا المجالس أمانات.. وضربني فظهري..

هي من واحد الناحية المجالس فعلا خصها تكون أمانات.. خصوصا ملي تايكون المگلس أو الگلاس ديال لكعاوي لخانزة.. ولكن هذا القضية ديال فضحني نفضحك.. واخا هي كاتبين ضعف المنظومة السياسية ديالنا.. كاتبين كذلك بلي هذا سياسيين دجوج دريال مايصلاح لوالديهوم غير شي إصلاحية لإعادة الإدماج التربوي.. لأنهم صراحة عيقو وعيفو هذا الشعب فالسياسة ومايجي من طاسلتها..

كنبقى كنشوف شي مرات كايبانليا هذا المغرب فحال شي فيرمة كبييرة.. والواليد فيها عندو شخصية وكاريزما وكاينمي فالفيرمة لمستقبل العائلة.. وفتربيتو تاينهج دائما  أسلوب الترهيب دون عنف لولادو المراهقين.. وخا كايديرو البسالة وشي حوايج بايخة.. هو على بالو بلي براهشو ناضجين.. كايبغي يكبر بيهوم وماتيبغيش يبهدلهوم.. خصوصا قدام الجيران.. ولكن البراهش ديما كايبقاو براهش.. گاع مكتصلاح معهم الكبرانية.. لأنهم كايشوفو فالواليد واحد داوي خاوي ومافيدوش.. والفيرمة دباهوم يديرو فيها لي بغاو.. لذلك فالواجب على الواليد الى بغا ينقذ رزقو.. يجبد السمطة ويخلا دار هذا البراهش باش يزيرو **** مع الشعب.. المرحلة اللي كايمر منها المغرب ماشي دلعب.. ولي بغا يلعب يمشي لغابة يلعب مع لقرودة.. على الأقل القرد إلى عاق بيك قولبتيه.. ما يعقلش عليك..