عبّر – المقزدر

واش گاع لي حس براسو تقولب فالوزيعة دالسلطة يخرج علينا بزواق كلامو، وعسل لسانو باش يبشرنا بأنه قادر على صناعة مغرب جديد فحال سويسرا شوية..!

واش حنا فين ولا فين، واش حنا فمحاولة تصحيح الوضع باش ما عطا الله، ولا حنا فوضع سيناريوهات ديال الأحلام الوردية، اللي أكل عليها الدهر وشرب، ولي ماليها مازالين معتقدين بجدواها.. واش گاع لي شاف راسو فشي شعار حزبو يجي يفتي علينا منامتو الغاملة..

ديك ليامات فاش ناس حزنو على موت محسن فكري، سي محمد زيان، عرفتيوه؟ مول حزب السبيع دلوقيد، جا قدام البرلمان وشي ناس جابيلوه الميكرو يعبر كي بغا، وهو يبدا يبكي على أعتابه، قال وقال وما خلا ما قال، قال خص الملك يحل البرلمان، ونعلنو حالة الاستثناء وبلا بلا بلا بلا.. واليوم عاوتني رجع قالها بعد خطاب الملك من دكار وتقريعو للسياسيين فالخطاب، ولكن في فيديو آخر، وزاد سي زيان اللي الظاهر والله أعلم أنه غابوحدو فداك الحزب، وكايدوي غا بوحدو نيت، بلي خص الملك يجرّي على كاع هادوك لي كاينين، بما فيهم حتى لي فالمحيط دالقصر، ويجيب بلاصتهوم 11 لواحد من الاكفاء يسيروا الوطن.. زعما منتخب على قدو..

واخا اسي زيان، نمشيو فالطرح ديالك “البناء” على سبيل الوصف، لأنه فعلا نتفق معك على ان النخبة السياسية فالبلاد خصها يدار فيها إعادة النظر، ولكن قولينا ها واحد العار، شكون هما هذا الفرقة ديال 11 اللي باغي الملك يعينهوم لتسيير البلاد، وهضر معانا بصراحة.. واش انت واحد منهوم؟ ولا غاتكون انت إطار فني ديالهوم؟!

للأسف حنى كاولاد الشعب أحيانا عقلنا كايوقف عن التفكير، واخا راه ديما واقف، ملي كانشوفو ناس من صنف مول السبع، اللي غمسو حتى غمسو فطبسيل السلطة، وتبرعو حتى تبرعو فمناصب الدولة، وفالأخير فاش هرب عليهوم تران، والمغرب كدولة، محتاجو كرجل دولة سابق باش يزرع حالة اطمئنان، ولو عالأقل في الفضاء الخارجي، يخرج بمثل هذه التصريحات اللامسؤولة والغير معقولة، لا فمضمونها، ولا فالجدية والصحة ديالها، ولكن العيب ماشي ديالو.. العيب ديال اللي خلقلينا بدعة الشعبوية فالبلاد.. والعيب الكبير على أسد الأطلس المنقرض، لأنه لوكان مزال عايش.. كون سلطناه على هذا النماذج ونماذج أخرى يفترسهوم.. لأجل هذا الوطن.. يا الباشار.. راه البلاد ماشي غنيمة.. زيرو معانا ولا بعدو منا.. واعطيو التيساع لهذا البلاد.